ra'iisal-wasaarihii hore ee dalkan ingiriiska oo ka hadlay kooxaha mayalka

Mr. Tony Blair oo ahaa Ra’iisal-Wasaarihii hore ee Dowladda Dalka Ingiriiska ayaa isaga oo u waramayay Warbaahinta dalkaasi waxa uu ka hadlay Muslimiinta mayalka adag ee ku sii faafaya qaar ka mid ah dalalka caalamka wixii ka dambeeyay 11kii September 2001dii. Markaasi oo la qarxiyay xaruntii ganacsiga adduunka ee Dalka Mareykanka.

Waxa uu sheegay Mr. Tony Blair in kooxaha mayalka adag ay rumeysan yihiin inay bannaan tahay wax kasta oo lagu fulinayo qadiyadooda, isla markaasina hubka Nukliyeerka haddii ay heysan lahaayeen ay adeegsan lahaayeen. Wuxuuna
tilmaamay Tony Blair in kooxaha mayalka adag ee Islaamka ahi looga hortegi karo in wadajir loola dagaalamo.

“Kooxaha mayalka adag waxay dalalka Somaliya iyo Yeman ee ay dadka ku dilayaan ma aha wax aan anagu ka dambeyno”! Ayuu yidhi Ra’iisal-Wasaarihii hore ee dalka Ingiriiska Mr. Tony Blair oo sheegay in kooxaha mayalka adag
lagula dagaalo meel kasta oo ay joogaan, ayna muhiim tahay in ugu yaraan niyadda laga diido.

Isaga oo ka hadlayay hadalada ay kooxahani dadka ku qaldayaan oo uu sheegay inay yidhaahdaan “Reer galbeedka ayaa xoog ku yeeshay Somaliya iyo Yeman”. Wuxuuna sheegay Mr. Tony Blair in kooxahaasi ay sameynayaan wax la soo
dhaafay xilliyo hore, taasi oo uu sheegay in kooxaha xag-jirka ah ay dilaan had iyo goor dadka rayidka ah iyo cid kasta oo ka hor timaada afkaarahooda cunsuriga diimeed ah.

Dhinaca kale Mr. Tony Blair waxa uu sheegay in dalalka caalamka ay iska kaashadaan olole ballaadhan oo lagu cidhib tirayo kooxo diimeedyada xag-jirka ah ee ku sugan dalalka Somaliya iyo Yeman, isaga oo tilmaamay in kooxahani laga soo horjeesto, falalka qaraxyada, dagaalada, is miidaaminta iyo ficilada xun-xun ee ay ku faafinayaan dalalka caalamka.

Xamse Ahmed Salaan
Safka-hore.com
London/UK