golaha guurtida oo maana loo akhriyey qoral uu soo gudbiyey madaxweynaha jsl.

Fadhigan oo uu shirgudooninayay Gudoomiye ku xigeenka 1-aad ee Golaha Guurtida Somaliland Sheekh Nuux Sheekh Axmed Fureh, ayaa markii uu fadhigu furmay waxa uu mudeyaasha ku wargeliyey in loo akhtiyi doono qoraal kaga yimi dhinaca Madaxweyne Axmed Silaano.

Qoraalka oo halkaas laga akhriyey, ayaa waxa uu Madaxweynuhu ku sheegay maadama oo xilka mudda-kordhinta ay distooriyan leeyihiin Golaha Guurtida Somaliland, oo xilkii Golayaasha Guurtida iyo Wakiiladuna uu dhamaanayo bisha September dabayaaqadeeda iyo bisha October dhamaadkeeda in muddo-kordhini ay lagama maar maan tahay.

Waxaana Madaxweynuhu muddo-kordhintaa ku sababeeyey in dalku hadda uun ka soo baxay doorashadii Madaxtooyada, dhaqaale la’aan, wakhtiga oo cidhiidhi ah iyo xeerarkii doorashada ee Golayaasha oo aan diyaar ahayn.

Sida ku cad qoraalka Madaxweynaha, waxa uu u soo jeediyey Golaha Guurtida oo iyagu leh qiimaynta duruufaha iyo xilliga lagaga bixi karayo inay la tashadaan daneeyayaasha doorashada oo loo fasirtay inay yihiin xisbiyada iyo ciddii kale ee danaynaysa doorashooyinka.

Sida oo kale waxa uu Madaxweynuhu qoraalkiisaa maant laga hor akhriyey Mudaneyaasha Golaha Guurtida uu ugu soo jeediyey Golayaasha Baarlamanka inay dhamaystiraan xeerka doorashada.

Gudoomiye ku xigeenka 1-aad ee Golaha Guurtida Somaliland Sheekh Nuux Sheekh Axmed Fureh oo isna halkaa ka hadlay, ayaa mudaneyaasha Golaha Guurtida waxa uu u sheegay in looga fadhiyo inay si weyn uga fiirsadaan mudda labada Gole loo kordhin karo ee lagu qaban karo doorasho.

Waxa kale oo uu Odoyaasha Golaha ugu baaqay in si wada-jir ah oo aan khilaaf lahayn looga doodo arrintan, iyada oo la eegayo sumcada Goleyaasha.

Muddo-kodhintan Guurtida iyo Wakiilada ka sakaw, waxaa iyadana Golaha Guurtida hor taala Goleyaasha deegaanada ee magaalooyinka Somaliland oo wakhtigoodii uu xilli hore-ba dhamaaday sidii doorasho loogu qaban lahaa.

Gudda-galka dooda la xidhiidha qoraalka soo jeedinta ah ee Madaxweynuhu u soo gudbiyey Guurtida, ayaa la filayaa inay si dhakhso ah u bilaabanto, iyada oo laga yaabo inay qaadato muddo dhawr maal mood ah, ka dib-na waxa laga sugayaa inay go’aan dhamaystiran soo saaraan.