khilaaf ka dhex oogmay df-da somalia oo ku saabsan dastuur cusub.

Wararka ka soo baxaya dhinaca Dawladda Federaalka ah ( DF-da ) ee Somalia ayaa waxay sheegayaan in maalmahan danbe uu khilaaf hor lihi ka dhex oogmey Madaxweyne Sh Shariif Sh Ahmed iyo Ra'iisal-wasaarahiisa, Omar Abdirashiid Sharm'arke.

Khilaafkan cusub ayaa la sheegay inu salka ku hayo dastuurka federaalka ee qabyada ah ee cusub, kaasi oo hore ay u soo diyaariyeen guddi madax bannaan bishii July dhamaadkeedii 2010. Weli se waxa la sheegay in aan la isla meel dhigin in la soo dhex dhego baarlamaanka iyo in afti loo qaado hadda.

                                                                                                        Omar Abdirashiid, Somali PM.


Waxase wararka qaar ay sheegeen in khilaafkani cusubi uu ka abuurmay qoraal ku saabsan dastuurkan cusub oo uu Raiisal-wasaaruhu u kala diray beesha caalamka, taasi oo aanu Madaxweynuhu waxba ka ogeyn, oo sida la sheegay aanu raallina ka ahayn waxyaabaha ku qoran waraaqdaas oo aan illaa hadda laga bixin wax faahfaahin ah.

Dhinaca kalena, kulan ay madaxtooyada ku yeesheen xubno ka tirsan baarlamaanka dawladda ku meelgaadhka ah, maalintii khamiistii, ayaa eedayn looga soo jeediyey xukuumadda Ra'iisal-wasaare Omar Abdirashiid, waxana lagu soo qaaday arrimo ay ka mid yihiin dastuurkaasi cusub.